طَلَّيْت يا أيَّار بَعْد الإنتِظار = تْوَشْوِش نسيم وْتِرجع تفلفش خَضَار
وكل العراوي الْ بعدهن ما تْبَكَّلو = بإيدك يا شهر الورد جبتلهن زرار
ونيسان لما ودَّع العمر الحلو = قلَّك بِنَهدات الزنابق والاقمار
ما اسعد العمر وبكون بأولو = ما اتعس العمر وبآخر يوم صار
بس بجمال الوطن وبْشَعبو الغني = لا بْيذبلو ولا بيخلصو أزهارنا
وصْنوبرتنا الْ مجدها ما بينحني = بتضلها مثل العروس بْدارنا
معليش يا نيسان لو عمرك فني = مثل ما قبلك فني أذارنا
أعمار الشهور بْيرجعو بثاني سني = ونحنا منين بْيرجعو أعمارنا
أيار إضحك للخيام وللقصور = وْزَهِّر بوديان الدِنِي وجبالها
زنود الشجر لاقوك عَ هز الخصور = والارض بالعمال هَنِّت حالها
ما اجمل العامل بساتينو يزور = ويضيع بين كْرومها وشلالها
ويقشع ندي بعد الشتِي محَّى السطور = عم يكتب الكلمة الْ بعد ما قالها
ويقشع مهدي رايحة تشيل الصخور = ونحَّات عينو من الحجر ما شالها
ويقشع فْراشة حول زهرة عم تْدور = مثل رقبة وحول منها شالها
ويقشع حديقة عاشقة ساقي غيور = مثل زوجة وعاشقة رجالها
وجدول ييجي من بعيد يوقع بالنهور = مثل الصبية اللي وقع سلسالها
وفلاح عم بِيْفتح شْبابيك نور = بْشجرة طلع لَ عْبَابْهَا تَيْطالها
تَتصير لما العاصفة عليها تزور = مثل مهرة وراكضة بْخَيَّالها
وفلاحتو راحت تفتش عَ السرور = بْطُهر الطبيعة الْ عُطُرها راسمالها
من الزعتر الْ ع ثيابها خلا عطور = بيغارو عطور الربيع قْبالها
وللبيت ترجع اول طْلوع لِ بْدور = وتبقى الطيور مْكَمَّشي بِخْيالها
وخْيال فلاحة على سرير الزهور = بْيشبه خيال الام عَ اطفالها
بْهَنِّيك يا عمال يا عايش هالشعور = وارض المحبة فيك يا نيالها
هيدي أرضنا الْ عشقتها الدهور = أرض الإله الْ حبها وغنالها
أرض منقوشة بدعسات الطيور = والهن عليها ذكريات الاله
إيَّاك تتركها حرام تصير بور = الارض الْ بلا عمال ما فيها حياة