 |
منتديات مجلة أقلام
(http://montada.aklaam.net/index.php)
- منتــدى الزجل والشــعر العــامي والنبـطي
(http://montada.aklaam.net/forumdisplay.php?f=7)
- - علشان أنا مصري
(http://montada.aklaam.net/showthread.php?t=20159)
علشان أنا مصري
عشان أنا مصري لازم أفوق
أشتغل بهمه ورأسي لفوق أعمل واجبي وأطلب الحقوق مهما عكروا دمي هأفرفش وأفوق عشان أنا مصري هاخلق لنفسي دور وأشتغل حتي لو فوت الموتور بسرعة أعمل له عمرة وأخليه يدور ألحق المستقبل وابقي مستور عشان أنا مصري لازم أحاول وأداور وأناور وألعب وأحاور أنط لفوق وأعدي من تحت كل المحاور ألف يمين وألف شمال وأفضل أحاول عشان أنا مصري لازم أعرف وأتعلم وأدرس وأقرا وأتثقف علي كل علم ومهارة إدارة هاتعرف أنظم وقتي وحياتي هافوز وأتشرف عشان أنا مصري هأبدأ بنفسي ألتزم بديني وربي وأرعي قسمي أولادي أعلمهم يرفعوا إسمي وإسم بلدي ورمزه الرسمي عشان أنا مصري هأشتغل بدل ما أشتكي وأسعي بجد بدل ما أنام وأتكي علي مسئول أو معارض مهما كان ذكي علي فكري وذراعي وإلهي متكي عشان أنا مصري هاعيش أمين حتي لو حوالي شوية نصابين هارعي حق ربي وهو الحارس الأمين مش هاجاري الجو وانضم للمنافقين عشان أنا مصري مش هاسمع أغاني ولا هأقضي وقتي في حكاوي تاني ولا لشاعر محبط هأبيع وداني بكلام سلبي يملا وجداني عشان أنا مصري هاكون إيجابي هأبني بيتي وأزرع ترابي وهأعمل مصنع يشغل أحفادي وأعلي سوري وأحرس بابي عشان أنا مصري كتبت كلامي أرد علي عم أحمد بكل سلامي واقول له علي مهلك يا أبو الأنجام لسه بدري ع اليأس والإستسلام مهما حياتنا فيها صعوبة وتبان للجاهل تفاحة معطوبة لكن جوانا بذور تملا صوبة تخلي بكرة دايما أحلي وأحلي عارف ليه ؟ عشان أنا مصري لازم أفوق أشتغل بهمه ورأسي لفوق أعمل واجبي وأطلب الحقوق مهما عكروا دمي هأفرفش وأفوق د.إميل صابر |
رد: علشان أنا مصري
عذرا للشاعر الكبير الاستاذ القدير أحمد فؤاد نجم لإضطراري لمخاطبته بلا ألقاب في محاولة للحفاظ علي موسيقي الكلمات
عذرا له أيضا أن يرسل له كاتب خواطر مجهول لا يباري قدرات الأستاذ الشعريه والإبداعية واللغوية لكني قرأت رائعته علشان إنت مصري اليوم وأنا في حالة لم تسمح لي بقبول العبث بمصريتي فكانت كلماتي البسيطه محاولة للتعبير عما يجول بخاطري |
رد: علشان أنا مصري
د اميل
الكلام اللي حضرتك كتبته لا يمكن أن يصنف شعرا ولا خواطر حتى يخلو من العمق والموسيقى سواء داخلية أو خارجية حاولت أن أجد سطرا واحدا يحمل أي نفس من انفاش الشعر أو الخواطر فلم أجد اسمح لي هذا بالنسبة للشكل أما المضمون فلم يكن أحسن حالا من الشكل الذي خلا من الواقعية ورجعنا لكلام أغاني الثمانينيات الوطنية التي قيلت في حب مصر أيام ما كنا نايمين على وداننا لكن مع عصر الفضائيات أصبحت الأمور واضحة جدا ولا تحتاج إلى تزيين عذرا لا تعتبر كلامي استمرار لخط الاحباط الذي اعترى الشعب المصري ولو أنني منه واحمل نفس الإحباط إلا أن مهمة الشاعر هي التبصير وإثارة المشاعر لرفض الواقع الكئيب أرجو أن تتقبل كلامي بصدر رحب ولا تنس أنني أيضا مصرية قوي |
رد: علشان أنا مصري
الأخت داليا
شكرا لمرورك أولا لن أناقش الشكل فأنا لا أعد نفسي شاعرا أما عن المضمون فإسمحي لي يبدو لي أنك لم تفهمي أنني لا أتحدث عن الواقع ولا عن الماضي لا عن شعر الثمانينيات ولا الالفينيات أنني يا سيدتي أتحدث عن نفسي أتحدث عن أنني سأبدأ بنفسي مهما كان الإحباط من حولي لن استسلم لنغمات اليأس القاتلة لم تشعري بموسيقي في كلامي لا داخلية ولا خارجية ليس إلا لأنك ترفضين محاولة سماع صوت أخر غير صوت رأيك ملحوظة أنا لست من المنضمين لأي حزب أيا كانت إتجاهاته كل ما هنالك أن هذه القصيدة مع ظروف أخري إستفزتني في الصباح لأتمرد علي هذا الواقع لن أهاجم المسئولين أو أنافقهم ولن أطلب من هؤلاء الذين قتلهم اليأس واستسلموا لإلقاء المسئولية علي شماعات الأخرين فقط سأبدأ بنفسي هل هذا ممنوع هذه هي القصيدة التي إستفزتني قرأتها منسوبة للشاعر الكبير أحمد فؤاد نجم عشان انت مصرى لازم تعانى وتفقد كرامتك بكل المعانى وتحرق فى دمك سنين مش ثوانى واوعى تصدق كلام الاغانى بتاع الحضاره وكانى ومانى ده كله هجايص مايدخل ودانى عشان انت مصرى العذاب بيناديك بتبدا فى يومك حاجات بترازيك فى نومك فى قومك تعكنن عليك تضايقك ولسه العماص فى عينيك مافيش ميه تشطف صابونه فى ايديك وجسمك ملزق وريحتك عاديك فتلبس وتنزل وفيك اللى فيك ورايح لشغلك حتحتاج مواصله ادى المترو واقف وكهربته فاصله وفى الميكروباص خناقه وحاصله اوتوبيس فرامله عايزالها وصله وتوك توك ده تايه ومحتاج لبوصله بتوصل لشغلك بدم اتحرق فى زحمه وكتمه وحر وعرق رئيسك سايبلك كومه ورق ده غير دمغه ضايعه وملف اتسرق وفى كام مواطن عامللك قلق بيشكى تقول له روح اندعق وعركه وهوجه وشاى اندلق ومخك خلاص من الصداع اتفلق هترجع لبيتك ده لو كان فى بيت هتوصل هتندم ياريتك ماجيت مراتك بتصرخ خلاص استويت عيالك بتطلب وهات كيت وكيت تزعق تهاتى ياناس اتهريت ولاحد سامعك مهما هاتيت عشان انت مصرى وده للاسف فلازم تأسى تعيش تتقرف وكل الاساسى فى حياتك ترف فتنسى الكرامه وتنسى الشرف وتسرق وتنصب او تنحرف ودمعك بيجرى وجرحك نزف |
رد: علشان أنا مصري
الدكتور العزيز / إميل صابر
إبن بلدى تحيه طيبه وحمدا لله على سلامتك وحشتنى جدا كتاباتك ياسيدى هل تتذكرنى أم لا ؟؟؟ المهم أننى أشاركك الرأى فى الاعتراض على ماكتبه الفاجومى من حيث الانتماء ولكن ألا ترى معى أن كل ماكتبه حقيقه تحدث لنا جميعا ليست هذه دعوه لليأس ولكنه وصف دقيق وحقيقى لواقع نعيشه ونحترق فيه نسأل الله السلامه والمنتدى نور بعودتك يادكتور أخوك / أحمد رشاد شلبى |
رد: علشان أنا مصري
صديق القلم وعالم الانترنت الفاضل / أحمد رشاد شلبي
أشكر ترحيبك الذي لا أستحقه لا أختلف معك ولا مع الأخت داليا ولا أستطيع أن أكذب علي نفسي وأنكر الواقع بالطبع قصيدة أستاذنا الكبير احمد فؤاد نجم تعبر بدقة عن الواقع سأحكي لكما ما حدث ليفسر موقفي تسلمت عملي الجديد منذ بداية مارس في إدارة إحدي شركات الدواء كل العاملين يشكون من سوء الأحوال وفوضي المدير السابق وسوء التنظيم وإنخفاض الدخل والخسائر الجميع يشكو بلا إستثناء من أول العمال الصغار إلي أصحاب رأس المال مرورا بالموظفين والإدارة الوسطي حللت الموقف ووضعت خطة عمل منظمة وحاولت تلافي السلبيات كل ما كانت تعتمد عليه خطتي هو العمل الأقل ولكن بنظام دقيق وإذا بثورة عارمة ترفض مجرد التغيير كل واحد يرفض العاملين يرفضون لئلا يزداد العمل مع أن زيادة العمل المنظم ستصحبها زيادة في الدخل مع راحة في الأداء أصحاب رأس المال يرفضون لئلا يضطروا لدفع مرتبات أعلي مع أن زيادة العمل المنظم ستصحبها زيادة في الأرباح وكانت إجتماعات مزعجة إمتدت الي نهاية اليوم إنتهت اإلي أنه لا أحد يرغب في التغيير وفي الصباح التالي فوجئت في أحد مواقع الإنترنت بالقصيدة منشورة كانت بالضبط تصور أحوال الموظفين قبل عرض الخطة وشكاواهم الشركة هي صورة مصغرة من مصرنا الحبيبة والعامل هو فرد من أفراد الوطن نطلب التغيير ونرفض أن نتحمل تبعاته نطلب من الأخرين أن ينهضوا بنا ونحن مصرين علي النوم إن إصلاح أحوال الشركة و / أو الوطن ليس بالشكوي ولا بالتذمر ولا بالضجر واليأس ولن يكون من الإدارة الإصلاح لن يحدث ما لم يبدأ كل منا بنفسه حتي لو كان كل من حولي لصوص سأكون أمينا حتي لو كان كل من حولي منافقين سأكون صادقا حتي لو زوغ رئيسي من العمل سأكون ملتزما هل أنا خيالي أظن ذلك فلنتحمل نتيجة سوء عملنا الشخصي ولنتحمل دفاعنا عن أخطاءنا وإبراز أخطاء الأخرين هذا ما حدث معي وياليتنا نفتح حوارا عن كيف يكون التغيير تغيير أنفسنا تغيير سلوكنا كل منا عن نفسه وليس عمن حوله أنا خيالي أعلم هذا عذرا للإطالة تقبل تحياتي |
رد: علشان أنا مصري
لم تشعري بموسيقي في كلامي لا داخلية ولا خارجية ليس إلا لأنك ترفضين محاولة سماع صوت أخر غير صوت رأيك
د اميل صابر لم ولن اكن في رأيي متعصبة ولم اهاجم رأيك لكنني ضد التعتيم الذي تشربناه على أيدي وسائل الإعلام العميلة والذي جعلنا نصطدم بالواقع الغامق الصورة فعلا غامقة جدا ومن حق كل إنسان انه يرى نصف الكوب المليان لكن إن كان هناك كوب أصلا ولا اختلف معك اننا لابد ألا نفقد الامل في التغيير لكن حتى يتم هذا التغيير لابد أن نرى الصورة صحيحة وليس مجرد كلام ولو كل واحد يحاول يغير في مجاله اكيد حنكون أفضل لكن الفرق بين كلامك وكلام عم الكل أحمد فؤاد نجم أن كلامه واقعي اما كلماتك فخلت فعلا من الواقعية وهذا ليس رأيي الذي انحاز إليه بل هي الحقيقة بكل وضوح سعيدة أنه هناك من لديه أمل في التغيير لكن ربنا يستر على التغيير لانه أصبح للأسوأ احنا في النازل وبسرعة رهيبة وكأننا في الملاهي الشعب يتلهي والعمر ينتهي ومحدش بيستحي فقط للتذكرة (اختلاف الرأي لا يفسد للود قضية) سعيدة بالنقاش معك كل احترامي وتقديري داليا فاروق الاسكندرية |
مشاركة: علشان أنا مصري
مصر !!!
ضاعت مصر .. ومات شعب مصر .. لم يعد هناك محل للشرفاء في مصر .. الدنيا كلها للرويبضة والمطبلين .. خشيت من فرط حبي لمصر أن أكره مصر .. الظالم لا بد أن يكون ذكيا .. ولم أجد في تاريخ الدنيا كلها أغبى من ظالمينا .. لكي تشغل منصبا لا بد أن تحمل طبلة .. ولكي تحترمَ فلا بد أن تقدس الطبلة .. ولكي تعيش فلا بد أن ترقص على دقات الطبلة .. لا تستغرب الرفض هنا دكتور إيميل الكريم .. كلامك جميل حقا لكنك كالذي جاء إلى محكوم عليه بالإعدام في غرفة الإعدام وقبيل تنفيذ الإعدام ليحدثه عن الأمل في الحياة .. عليك أن تنتظر البراءة المستحيلة حتى يكون للكلام صدى .. ادع لك ولي ولكل شعب مصر بالبراءة .. وبأن يزيح الله عز وجل عنها كل التهم والتهمة العظمى .. تحيتي أخي الفاضل .. |
رد: علشان أنا مصري
الأخت داليا
مهما كانت ظروف مصر سأحب مصر لم أختار أبوي وهما ليسا أغني ولا أعلم ولا أوسم أبوين لكني لن أحب سواهما ولن أرضي عنهما بديلا اتمني رضاهما وأسعي لإسعادهما هكذا مصر مصر ليست وطن أعيش فيه لكنها وطن يعيش في ( مقولة للبابا شنودة ) سأبدأ بنفسي وأحاول لا أطلب من أحد غيري أن يحاول شكرا لك ومن المؤكد أن الخلاف ف الرأي لا يفسد للود قضية |
رد: مشاركة: علشان أنا مصري
اقتباس:
ابن بلدي الكريم الغالي حتي المحكوم عليه بالإعدام يظل بكل أمل أن ينقطع الحبل قبل التنفيذ وإن لم يكن لديه هذا الأمل فله أمل إن تاب في حياة أبدية صالحة أما فقد الأمل فهو شئ مميت سأظل بكل أمل أن يبدأ معي ولو قلة قليلة كل منهم يبدأ بنفسة |
رد: علشان أنا مصري
21/8/2006
تحيا مصر تحيا مصر تحيا مصر تحيا مصر ده مش هتاف دي مش تحية دي أمنيه بأتمني أن تحيا مصر مش عشان حبي ليها لا بأتمني أن تحيا مصر مش حب خالص لوجه الله بأتمني أن تحيا مصر لأني أحب نفسي باتمني أن تحيا مصر لأني أناني لأنه لما تحيا مصر أنا كمان ها أحيا لأنه لما تعلا مصر أنا كمان ها أعلا أنا مش ناوي أعيش غير في مصر وعشان كده أمنيتي تحيا مصر لذلك لأجل نفسك تمني أن تحيا مصر د.إميل صابر |
رد: علشان أنا مصري
على فكره يادكتور
أيه رأيك فى هذه الرساله التى وصلتنى من صديق وتذكرتها عند كلامك عن المصرى أيوه إحنا المصريين مختلفين عن الآخرين *المصري هو اللّي ممكن يعدي التلاتين ولسه عايش مع أمه وأبوه وماعندهومش مشكلة بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد بيحط الريموت كونترول في كيس بلاستيك كعادة فرعونية يقف يتكلم على الباب نص ساعة بعد إنتهاء الزيارة والسلام لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد ييجي بعد معاده بساعتين ويفتكر إن ده عادي لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه بيعتبر نفسه أفضل واحد في الشرا والفصال وبعد كده يكتشف إن الحاجة في المحل اللي جنبه أرخص من غير فصال بيحتفظ بأكياس محلات اللبس والأحذية وورق الهدايا تحت مرتبة السرير لسنوات ومابيستخدمهاش عنده صينية مكسرات متقسمة لتلات او أربع أقسام لزوم المزاج وعمره ماإستخدمها بيشتري قبل الفطار في رمضان مواد إستهلاكية أصلا موجود عنده في البيت لسه ماستخدمهاش بيكون عنده شواية لزوم الرحلات أقصى استخدام لها كان مرة واحدة في العيد بيشيل طابع البريد من على الظرف لو الختم ماكانش عليه بيفتكر إن أي حد بيشتغل في الخليج بيغرف فلوس من غير حساب لسه بيخلط بين أغنية بوس الواوا والواوا أح ، وبيفتكرهم أغنية واحدة بيكون مشغول بقيمة التيبس أو البقشيش طول العشا ياترى ربع جنيه ولا نص جنيه برده بيتخانق ساعة دفع الحساب بحرارة شديدة على إنه هو اللي لازم يدفع سرقوا منه العربية بس مشكلته هي المايتي زينجر بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم ، وساعتها بيفرش له الملاية |
| الساعة الآن 11:58 PM. |
Powered by vBulletin® Version 3.8.3
Copyright ©2000 - 2026, Jelsoft Enterprises Ltd.
جميع المواضيع والردود المنشورة في أقلام لا تعبر إلا عن آراء أصحابها فقط