ماسك ف تلابيب الخروج
وما كانش ممكن...
يبتدى خروجى
غير لما يأذن لى البراح
بالهجرة م المجهول
ولا كانش فيه...
قدامى تانى بديل متاح
غير إنى أقبل اعيش مدان
بالهرولة لمرافىء الجدب ....
المراوغ بالخضار
ف عيون ما حستش الامان
إلا ف دفا ضلى الفسيح
كل الأمانى اللى انتمت للغيم
وعاشت مستَفزَّة ...
تجاه ماضيها اللى انتسب ....
للحلم بالعصيان
إستنفرت همم التمرد وابتدت
تكتب عرايض الاتهام ضدى
لحظة مافكيت القيود
عن حلمها المسعور
ولا عمرها ...
راودت مرايات رفضها
- رغم إنحسار سيل الامل
عن وادى دنياها العبوس -
إلا قصاد سعيىّ الغبى
لإنى اهدهد حزنها المغدور
هجمت عليا بعريها الجاحد
بجيوش تدافع عن تدانيها الضرير
من هوة النهايات
وكأنها...
عشقت أنانية طموحها المستحيل
ف الإنبهار بالزيف
لحظة دخولها
لمملكة ظنّى النبيل
دمى الحسيس
خاننّى بلجوئه للسكات
واتبجحت جوايا اوجاعى
لما رضيت أستفتى ع المحسوم
وكتبت مزامير انسحابى
للتلاشى المستباح
وبدأت احس ...
بطعم أهوال الخروج ...
صفر اليدين
إيه اللى كان ينبغى ؟ !!
علشان أعيد
سيرة صياغات إستيعابى
للوجود؟!
وإيه ماكانش مباح ..
لحظة أفول الخوف ؟
ولإمتى ح افضل كده ...؟
واقف على حافة بكايا
وبارتجف !!!
ماسك ف تلابيب الخروج
عن هوجة المالوف ؟!