[داليا فاروق]

انكسر
واتبسمت فجاة الشفايف
وانتهى
إوعى تشدك عندها
ضربة حجر فوق الحجر
بسمتها مليانة أسى
معجونة باللي ما اتنسى
واليوم يعدي جنبها قد السنة
قول ميت سنة
حتى السنا
تلمح خياله
وانتهى
وحلفت تاني باللّي عايش واللّي مات
أو تهت تاني بين سطور المعجزات
أو مت تاني تحت أنّات الآهات
لازم تصدق
إن صوت الحزن أحلى ملحمة
إن لون الحزن حتّة م السما
وحزنت ساعة ما انكسر قلب الطريق
وحزنت ساعة ما اتشنق شوق الغريق
واخترت جنبي تسكنه
لما ابتدى عمرك يضيق
شوف اللي فاضل مننا
كانت خطوي مخضّرة
من قبل ما يجيها المطر
كانت ليالي منورة
تنقش سمانا بالقمر
فين اللي كانت يا ترى
راحت تداوي اللي انكسر
آدي اللي فاضل مننا
أحلامنا تبقى منمنمة
بين الورق من كام جهة
قول ميت جهة
والأبهة والعنجهة
والحرف لسة بيتحشر
والقلب لسة بيتعصر
والعمر رافض ينتهي
بين الحيطان المعتمة
فين اللي فاضل مننا؟
يا قلبي اسمع وانكتم
اللي انكسر
مش جوة منك يا أنا
إللي انكسر
هوّ أنا