[وحيد وصفى]

سهران مع قـْزازِة دموع
عشمان تـِتـُوه
مع إن كل شـَفـْطـَه مِنـْها
فوَّقِت فيك حـَبـِّتين
.... إشرب بـَقـَى

تصاوير بتـِتـْمايل
خيال
أصوات بتترَدِّد
صِريخ
و روايح النوم
و الساعات بـِتـْمُرّ
كل ما تبتدى تنعَس
... تـِفـُوق

آدى كمان ليله
مافيش فايده
لا عارف تتسِطِل
و لا جاك نـُعاس
و المصيبه
ان انتَ فايـِق
و الصـُّداع
خمسين سيجاره يوماتى

عَشـَر سنين بتتكلم بصمت
مع الشجر

إيَّاك تسافر
إوعاك تخونك خطوتك
إوعاك فى يوم
بَعْد السـُّكات
تِنـْطـَق دموع
أو تِتـْسِحـِل ورا رغبـِتـَك
فى الخوف

إسند إيديك حوالين خدودك
و ابتسم
دنياك غريبه
كلامك المحشور فى حَلـْقـَك
صوت و بيزلزل ضلوعك
قِصـِّتـَك لمَّا اتْحـَكِت
سالِت دموعك
و القِزاز ادَّلـْدَقِت
على حِجْر بـُكرَه

سبتمبر 2006