نحب بعضينا
مهلبيه بالتقـليه
كشرى فول طعميه
ثورتنا كانت مصريه
فيها الف شكل ولون
ومن الطعم ميه
بنات .. ستات
شباب .. افنديه
فنانين
عمال فلاحين بجلابيه
حتى النصابين والحراميه
على كل شكل ولون
يا مصراويه
قلب واحد كلمه واحده
قولو.. حريه
وقع الحكم وحبسنا
الحراميه
لحد هنا ميه ميه
ثورتنا بقت عالميه
فتحت باب الحريه
من غير غربال ولا هويه
دخل مع الداخلين
الظلاميه والضلاليه
عاثو فسادا واذيه
لتشويه الثورة المصريه
باسم الحريه
مين دخل وسطينا
مين عايز يهد امانينا
مين ليه مصلحه
غير اللى جنبينا
مين بيهد الجامع والكنيسه
مين عايز لينا المصيبه
الكـــبيــسه
ثورتنا ماكنتش دينيه
ثورتنا شباب الحريه
ماخرجتش م الازهر
ولا الكنيسه المرقسيه
خرجت من عقول
اليكترونيه
ثورتنا لينا وبينا
قالت
نحب بعضينا
ايدك فى ايدى
تقوينــــا
نسد الطريق ع اللى
آ ذ ينــــا
ليه نحرق مبانينا
ليه نموت اهالينا
ونسمع ونصدق
فتن فينــا
كلنا راكبين السفينه
اصحى ياصاحبى
لاتغرق بينا
ودا غرض اعادينا
يحميكى ربى
يامصـــــر لينــــــــــــــــا
عصام سالمان