[عيسى عدوي]

ما عاد ينفع يا حماس ويا فتِحْ
كل ما قلت جرحي اندمل بِِِفتَح جُرِحْ
وقتيش بدنا نقوم نبني هالصرحْ
نرمي عن ظهور الشَّعِب حِمْل المَلِحْ
كل ما قلت هانت و باشرني الفرِحْ
شفت الوجع بيزيد وبينقح نَقِحْ
***********
اليوم شفت إبليس واقف ع السطح
يعطي أوامر نارها تلفح لَفِحْ
حَسيت ها لملعون ناوي ع الذبح
واقف وناوي الشر وبإيَده رُمِحْ
قلبي نقزني وهاج في صدري القرح
ناديت يا ربي العفو قبل الصلح
*********
بعدو العدو واقف على حدود البلد
جوا الحواري والشوارع ما ابتعد
بقتل وبذبح ما رحم شيخ وولد
والسور واقف في الأرض مثل الوتد
بقطع شرايين القلب ويحز في وسط الجسد
يا ريت ننسى هالكراسي ومين ع الكرسي قعد
وننسى صراع ديوكنا وفن النطح
*********
ما عاد بدنا لا كراسي ولا رتب
ولا عاد ينفعنا مواعظ أوخطب
واللي حسب حاله غلب
خسران حتى لو كسب
لمو الصفوف اليوم ..يا اولاد العرب
وإخزو الخسيس إبليس ...قصوا ها الذنب
والوعد بالنصر إقترب
والشعب فاير بالغضب
والليل روَّح والفجر وقته إقترب
يا رب تهدي شيوخنا لدرب الصلح
وترش فوق فوق دروبهم ورد وملح
نصحا الصبح نلقى الفرح في بلادنا قبل الصبح