الطاهرة مش جوه الضريح

[حسام حسين]

[center لما اصطدم
صوت الضجيج وسط النغم
بصيت لاوراقى القديمه المُهمله
وقلت احترم..
قلبى الصُغير وانسحب
من دون ما خلّف
ضجة تحرم ف الحضور
متعة سماع لحن الالم
حسيت فى شيئ فيا اختفى
حسيتنى حالة برد
محتاجه لدفا
فمشيت بخطوة سلحفا لحد التابوت
أتلو ف كتاب الموتى
اذكار الشفا
واما انتهى
كل اللى كان بيحسو م الناس كلها
شاف بالبصيره
حقيقة صارخة مُجسدة
بتقوله : عارف
فيه مسافه
بين شعورك بالحياه وطعم الحياه
فيه فرق شاسع
بين تدافع
كل اوجاع البشر
وانت اما تنطق مرة آه
مش كل آه حتمثلك
وتكون رسولك للحجر
ولا كل من أُوتى البلاغة حيوصفك
ولا كل من رفع المصاحف ع السيوف
كان عنده وازع ينصفك
فارفع ايديك عن شعرك المسموم
وسيبه
برغم انفك يفضحك
مهمن بلغ ضعف الثقة
ان البشر راح تسمعك
قول كلمتك
ريّح ضميرك واعترف
ان الوجع
لو كان وجع ذات مُفرده
سهل الشفا
وان الالم
اكبر كتير من علتك
فهّم ف جيل الامتهان
ايه هى اصل المشكله
احكى الحكاية اللى ابتدت
ياه ع الغبا
هى ابتدت ولاّ انتهت
يوم ما اقتحم
جيش الاماره الدنيوى
دنيا الولى
يوأد آماله ف مهدها
يوصل بروج ظنه الحسن
وبشكل قاسى يهدها
يرميها لكلاب السكك
فى القريه دى اللى بجد ..ظالمه لأهلها
نفسى ف ساعات
اصرخ بصوتى ف وشها
يا قريتى الناسيه الحقيقه ف اصلها
خدى منى انا السر الخفى
يمكن تفوقى وتعرفى
كان ليّا ايه فيكى ألا أم بحبها
فى الماضى كنت عاهدتها
افرد بساط المستحيل
تخطر ..تدوسه برجلها
واما التقت
عجزى المدجج بالفشل
وضياع شعاع آخر امل
ماتت بقصد تحلنى
من اى وعد قطعته ليها اما اختفى ف وشى النهار
م الموت واظنك تعرفى ف أسرتنا
بيبان اختيار
مع انه كان
حتماً قدر
فاطمّنى
يا سيده لكل العصور
ولا حانتفض ولا يوم حاثور
كافر بحسنك معبدى
درويش انا وأرعن غبى
خمسين سنه مكدب كلامهم
عن ضياعك ف المدن
خمسين سنه وانا بانتحر
من سم عشاق الوطن
ادخل كما الأجرب كسيح
شايل بفضلة قوّتى
بآخر قروش من ثروتى
شمعايه اقيدها على الضريح
استجدى ف عينيكى المدد
ملبوس بجان عشقك ولد
مسطول بدخان البخور
ولا يوم بافوق ولا باتسند
على ايد مُريد تدينى حل لازمتى
يا هلترى قبل اما اموت
مسوح بحب ان اسالك
انتى البلا
ولا البلد ؟؟!![/

[عيسى عدوي]

قصيدة ..رائعة يا حسام ...أهلا بك في أقلام العزيزة ...قصيدة ..تستحق التثبيت ..وشاعر يستحق ان يحتفى به ...مرحبا بك يا حسام ...ولك من أخيك ..خالص المودة

[حسام حسين]

العزيز/ الاستاذ عيسى عدوى
شكرا لمرورك على هذه القصيدة ولتشجيعك واتمنى من الله ان اكتب كل ما يليق بالتواجد معكم وتقبل مودتى تقديرى

[إياد حياتله]

الله الله
رائعة أخي حسام
وكم كنت أتمنى أن يتاح لنا تسجيل هذه القصائد وسماعها بأصوات أصحابها
أتمنّى أن تصل بنا تقنية المنتدى لها

دمت بخير

[حسام حسين]

الاخ المحترم/ اياد حياتله..شكرا لك هذا الثناء وخصوصا انه منك فهومسؤولية على كتفى والحمد لله الذى جعل الذين يتصدون لشعر العامية فى المنتدى هم نفسهم الذين يعلقون على ما اكتب وهذا فى حد ذاته شرف..شكرا لك

[د. فوزى ابودنيا]

اخى حسام سعدت بقراءة هذا العمل المميز
لشاعر متمكن من ادواته الفاعلة
تقديرى لك

[أشرف الشافعى]

إيه ده ياعم حسام
أولا هذاأطول نصوصك على الإطلاق ...
وربما يكون طوله على قدر المحنة
حمسين سنة ياعم مش اى كلام
ثانيا :- النص أصعب من ان نعلق عليه باول قراءة
وصدقنى وأنا اكتب لك اقوم بطباعته للإستفراد به
ومحاولة التعليق على هذا النص او المرور عليه عابراً
ظلم كبير للنص وإثم لا اتحمله
ولكن ارجوا ن تنتظر منى دراسة عن هذا النص
تتضمن رؤيتى وتماسى مع شعر حسام حسن بشكل عام
فهو ملىء بكل مايميز شعرك من لغة واسلوب وفلسفة وثقافة وتناص ..و .. و ..و
حسام ..
م الآخر ... النص ده ماينفعش يعدى كده
تحياتى وأشواقى يابرنس
ووحشنى البدروم والله وتمشيتنا فى جمال عبد الناصر بعد 3 الفجر
آه .. لربما يجمعنى بك الله قريباً
أخوك / الشافعى