حــــــــــــــــل المســــــــــــــــــــا

[نجيب صبري]

حَلِّ المَسا

حَلِّ المَسا وِاللّيل بِثْيابو = مْخَبّي اسْرارِ كْثير بِعْبابو
وِتْغازَلو بْوِجْهِ السَّما نِجْماتْ = ضِحْكو وْلِعْبو كْثير تا ذابو
ونَسْمات عِمْلَت في الفَضا زَفّاتْ = هِدْيو وْرَقّو ، ووَشْوَشو وْطابو
جابو مَعاهُم جُمْلِةِ حْكاياتْ = شَلّالْ عِطْر بْخاطْري انْسابو
وِالقَلِب شارِد بين وَدّي وْهاتْ = مَشْدوه عَلْ غابو وْما غابو
وفَجْأة ، أجا زائِر عِ قَلْبي فاتْ = أسْمَر خَفيفِ الدّم شو جابو !
كُلِّ الشِّعِر وِالنَّثِر فينا ماتْ = وسَكَّر عَلينا اللّيل أبْوابو
وِتْأرْجَحَت بَيْناتْنا النَّظْراتْ = تِحْكي عَنِ مْصابي وْعَنِ مْصابو
هَالزّائِرِ ال كُلّو حَلا وْحُلّاتْ = لِبْدور خُدّامو وْحُجّابو
جايي تَيِتْنَفَّس مَعي بِالذّاتْ = حَيْثِ العذابِ ال صابْني صابو
وِتْلَفَّتِت عَ مْوَرَّدِ الوَجْناتْ = وِتْحَرَْكَشِت ، قَرَّبِت عَ جْنابو
شُفْتِ بْعُيونو القَهِر وِالوَيْلاتْ = وِمْعَلّقَة الدَّمْعات بِهْدابو
وِعْرِفِت سِرِّ كْبير يا ساداتْ = لَوْ تِسْمَحولي أقْرى بِكْتابو
العِشْقِ الفَلَسْطيني إلو عْلاماتْ = الله يْكون بْعون أصْحابو
نِحْنا عْشِقْنا الطّير وِالنَّغْماتْ = وِالكَرِم عِنّابو وْاعْنابو
نِحْنا عْشِقْنا الزَّرِع وِالمَيّاتْ = ونِقْسِم وَطَنّا نْموت عَ تْرابو
نِحْنا عْشِقْنا الرّيم وِالفَلْواتْ = نِحْنا عْشِقْنا الحَقِل وَعْشابو
نِحْنا عْشِقْنا الخيل وِالسّاحاتْ = نِحْنا عْشِقْنا السّيف وِقْرابو
هذا وَطَنّا مْقَدَّسِ بْآياتْ = لَ جْلو عْشِقْنا الموت وِسْبابو
ولَ جْلو مْنهْدي الرّوح وِالدَّمّاتْ = وِاللّي يْعادي نِخلَعِ نْيابو
" يا مَوْطِني ألْقاك = في الصَّرْخَةِ ..... الصَّمْتِ "
" في الغَيْبِ وَالإدْراك = في البَحَّةِ ......... الصَّوْتِ"
" فَلْتَفْتَحَن عيْناك = وَلْتَشْهَدَنْ مَوْتي "
" حَتّى أعودَ أراك = ناراً عَلى الجِبْتِ "
يا مَوْطِني يا مَطْلَعِ اغْنِيّاتْ = عَ شْفاف عاشِق ضَم أحبابو
ومَطْلَع قَصيدي ممَوْسَقَة الأبْياتْ = صَلّو لَها طْيورِ الغِنا وْتابو
يا مَوْطِني يا زارِعِ الهِمّاتْ = بِجْناح نِسْرِ الجَو وِعْقابو
عُقْبانَك ال حامو عَلى التَّلّاتْ = شَبّو عَ حُبِّ تْرابَك وشابو
يا وَطَن فيكِ الحُب شو مَذْبوحْ = بِنْزِف أسى فِ حْلوق رُوّادو
جِبْلي فَلَسْطيني مَ هو مَذْبوحْ = حَتّى بْعِشْقو لْ طينِةِ بْلادو
حَتّى بْعِشْقو إلى حَبيبِ الروحْ = مَذْبوح ما بِقْدَر عَ إسْعادو
مَذْبوح وعَ فْراشِ العَنا مَطْروحْ = وِالوَجَع زادو وكُل زُوّادو
قُلّي الفَلسْطيني لَ مينِ اروحْ = وِاللِّص سارِق ثوب أمْجادو
يا لَيْت عَنّا هالحَرامي يروحْ = ويوخِذ مَعا نيران أحقادو
وتِرْجَع أرِضْنا بِالعُطورِ تْفوحْ = ونِصْحى عَلى ديكِ الفَجِر بيصيح

[عيسى عدوي]

أخي العزيز أبا هيثم ...اهلا وسهلا ومرحبا بالشاعر الكبير
إن فرحتي بدخولك المنتدى لا توصف ...فأهلا وسهلا ..خاصة وأنت تدخله بقصيدة جميلة ورائعه ...
نتمنى أن تطيب لك الأقامة في أقلام ..وان نسمتع بالأطايب من أفكارك وقصائدك الجميلة ...

يا هلا

[إياد حياتله]