إخرس !! متنطقشي .

[عبدالحليم مدكور]

	إخرس !! متنطقشي

سلسلة " إسكتشات " ساخرة
تناقش هموم المجتمع وقضاياه في إطار كوميدي

الأولى ( عيش فولكلور )

كان ياما كان ؛ كان فيه هنا
في مصر ناس ! مش زيّنا
شالوا تراب الأرض في عيونهم
مش زينا ؛ عايشين بنلعن بعضنا !
***************
في عهد يوسف الأمين
زرعوا وخَزَنوا سبع سنين
وأكلوا سبعه من الخزين
وأمّنوا قوت البشر : مدة سنة

*********

دلوقتي و فــ عصر الشهادات
والرقص والكورة والشات
واللإستيراد والإنفتاحات
الشوك طرح ، والموت سرح ؛في أرضنا
***********

يا ولاد بلدنا يا افنديات
سيبوا البِدل وإرموا السيفيهات
تعالوا نعيش في تبات ونبات
نزرع كرامة ، وخير يفيدنا كلّنا
**************

الأرض عرض ؛ ورزقنا غيب
والشغل ما هو حرام ولا عيب
العيب عليك لو عشت غريب
تربّي في غير وِلْدِنا
*************

بقه مـ الغريب نشحت قوتنا
وعلى زرعنا نبني بيوتنا
ويقولوا من كال لقمتنا
لابد يسمع كلمتنا
بالذمه دي مش مسكنة
**********

بقينا نزرع عطر وتوم
والقمح نستورده مسموم
إيدك فــ إيدي يا أخوية نقوم
نغرس بإيدنا زرعنا
********************

النــص

في أحدى سيارات الأجرة بالعاصمة ؛ ضوضاء مصدرها جهاز "الكاسيت " بالسيارة ، تنخفض الضوضاء قليلاً بفعل السائق ، ويبدأ بمطالبة الركاب :
- الأسطى رمضان : الأجرة يا حضرات ؟
يخرج شعبان أفندي كيساً به عملة معدنية ، يختار بعضها ويناولها لمن أمامه .
- شعبان أفندي : خد يا أستاذ ابعتلو : نفرين ؛ كلها فكة ،خلي بالك لا حاجة تقع .
- الأستاذ جمعة : هيه الشلنات والبرايز مش بِطلِت ؟
- شعبان أفندي :بِطلِت إلزاي .. يابا ؟! مش فيه مشط كبريت ببريزه ؟!
- الصول خميس : وفيه رغيف عيش بشلن ؛ لما رغيف العيش أبو شلن يبطل ؛ الشلن يبطل .
- المعلم رجب : هوه فين رغيف العيش أبو شلن ده ؛ دا أنا أول إمبارح : بعتّ الواد إبني يجيب بتلاته جنيه عيش !! غاب ساعتين ، وفي الآخر جاب العيش كله .. مدلوء عليه كلور !! تصور بتلاته جنيه عيش كلّه كلور ؟!
- شعبان أفندي : وأكلتوه ؟!
- المعلم رجب : ناكل أيه بقول لك كلّو: كلور !
- الأسطى رمضان :على فكره لو قمرتو : الكلور هيطير ، وهيبقى زي الفل .
- المعلم رجب : بتتكلم بجد ؟!
- الأسطى رمضان : هوه لسه العيش موجود وللا إتصرفتوا فيه ؟
- الأستاذ جمعة : طاب وتقمرو ليه ، فيه حل أحسن : إنته لو ضيفت "5 جرام فوسفات باريوم" لكل رغيف ؛ الكلور هيتحول لملح ؛ وبدال ما يبقى عيش بس.. هيبقى عيش، وملح ؛ يعني مش هتحتاج غموس.
- المعلم رجب : أضيف فوسفور إيه ؟!
- الأستاذ جمعة : فوسفات باريوم لا مائي + عيش عليه كلور؛ = كلوريد الكلور + رابع أكسيد الخرّوب ، دي معادله معروفه في الكيميا .
- شعبان أفندي : أهوه يا عم راجل كيميائي وحل لك الموضوع .
- الأسطى رمضان : بس سيبك إنته العيش كان أبيض ولا لأ .
- المعلم رجب : الشهادة لله : كان أبيض ، أبيض قوي كمان .
- الأسطى رمضان : بس ! ما هوه ده الفكر الجديد بتاع الحكومة .
- المعلم رجب : يا سسسلام ؟!
- الأسطى رمضان : أيوه .. الناس كانت بتشتكي من إن رغيف العيش إسود ؛ قامو ضايفين له: كلور عشان يبقى اكثر بياضا .
- شعبان أفندي : على فكره دا بييجي عنه إعلان في التليفيزيون ! صدقني ؛ أنا بكلمك الصح .
- المعلم رجب : شوف يا جدع إلزاي ! الحكومة بتفكر فينا ليل نهار، وإحنا برضو مش طمران فينا أي حاجة .
- الأستاذ جمعة : على جنب يا ريس أنا نازل هنا .
- المعلم رجب : لو سمحت يا أستاذ ؟!
- الأستاذ جمعة : نعم ؟!
- المعلم رجب : ممكن تكتبلي إسم الخلطه ، اللي حضرتك قلت عليها من شوية ؛ أصل أنا بتعرض للموضوع ده كتير ومقدرش أجيب الرغيف أبو ربع جنيه , وياريت لو تكتبلي سعر الخلطه دي برضو ؛ أجيبلي كيلو وللا اتنين منها , يبقى لك ثواب .
- الأستاذ جمعة : أهوه : فسفوت الفيسفون لامائي ، لا إرادي + خامس برومبد المنجنيز ، كد يد2أ ، هـ ط ل ، في درجة حرارة الغرفة .
- المعلم رجب : اكتبلي برضو الكيلو منه بكام.
- الأستاذ جمعة: بص !! المية جرام بتعمل 70 جنيه ، وبتكفي لحد عشرين رغيف.
- المعلم رجب : يعني بجنيه عيش يقف ب71 جنيه ؟! إلهي يخرب بيت ..
- الصول خميس : اخرس ما تنطقش .