ضيعة / شعر عامي من سوريا / نزار بلال

[نزار غانم بلال]

ضيعة
لما القمر.. سكّر شبابيك السهر
رحّل ...والشمس عرشت مقعدا
كان الزهر غفيان ما هَمو حدا
صَحصَح ع ضحكة ضوّ عا قطرة ندى
والنحل من تمّ الفجر طاير بهالبستان
يعزُف قصيدة ... معسَّـل مقصدا
وطيور تحــوم فوق بيدر هالقمح
وطيور على الأغصان تنَقي مرصدا
تا تقـنُـص الحبّـات من حواف الرحى
و تهرب مع النسمات مايشوفا حـدا
حسون يرقص عارقبة العنقود
ويغازل الخصلة بنقره عالهدا
والنهر تعبان ...خصرو ملتوي
ميّـات تمَسِّـد حوافو وفي إلها صدى
والشجر بجذوعوا عشعش عنكبوت
صورة دهر هربان ضايع بالمدى
ريحة رغيف الخبز تعبق بهالتنور
من حَمرة الجمرات لِ قلعت أسودا
محراث جدي تاكي عا جذع بلّوط
يراقب الزرعات ونسمه تهدهدا