قصيدة البيت الجديد تقديم اسماعيل أحمد

[هشام النجار]

البيت الجديد .. للشاعرة/ زينات القليوبي
قدمها بقلبه / إسماعيل أحمد
حين سمعت هذه القصيدة لأول مرة في معرض القاهرة الدولي للكتاب من الشاعرة مباشرة اُخذت بها وانتابتني هزة ستصيبك وأنت تقرأ كلماتها.. لكنني للأسف نسيت اسم تلك الشاعرة الرائعة وظللت أبحث عنها شهوراً عبر الإنترنت.. حتى دلني عليها أحد أصدقائي وكان سمعها مثلي وأعجبته.
والآن أبحث عن قصيدة أخرى لها تقارن بين إبراهيم وإسماعيل وأبناء هذا الزمان.. سمعتها مع هذه القصيدة يومئذٍ لكنني لم أجدها.
هذه القصيدة تأخذنا لأم يفاجئها ولدها برغبته في اصطحابها لبيت المسنين بحجة أنه بيت جديد.. لكنها تقدم احتجاجا ً باكيا .. ًسيترقرق له دمعك...

البيت الجديد

بتلم ليه الهدمتين والطرحتين والشبشبين ؟

ماتقوللي يا ابني واخدني فين؟؟؟

علي بيت جديد؟!! .. ما أنا ليه بيت

هو أنا يا ابني اشتكيت؟

مش عايزه يا ابني بيت جديد…

البيت دهه أنا عشت فيه خمسين سنــــــــه

ما اعرفش غيـــره أي بيت ؟؟؟

أنا جيت عروسه صغيرة

وقعدت فيه لمّا أتحنيت

مين اللي قال أنا عاوزة بيت

أسأل بلاط الأرض ؟؟؟.. وأسأل كـــل حيــط

مش عايزة غيره أي بيت ؟!!

أنا عشت يا ابني سنين هنا ..

وأتمنى أموت برضك هنــــا

أفتح عينيه كل يوم ..

وأقفل عينيه كل يوم

علي فرشتي ومخدتي والبطانية واللحاف

علي أيد أبوك بتضمني ف صورة الزفاف

بتدفي قلبي وتحضنه ف سنيـــــــن عجاف

في الأوضه دي أنا لسّه عايشه ويّا أبوك عمري اللي فـــــات !!!

أصل الحبايب لوسابوك، بيعيشوا فيك بالذكريات ..

خليني يا ابني ويّا أبوك أصحي وابــات

واشم ريحته ف الحاجـــــــات

وأعيش معاه باقي الساعات

مين اللي قالك .. إنه مــــــــــــــــــات؟!

لسّّّه البدل جوّه الدولاب ..

جنب السرير أخر كتاب

نضارته أهي وعبايته أهي

ولسّّه سجادة الصلاة..

والسبحة فوقها منـــوّره ف سنين عجاف

ولسّّّه بااسمع ضحكته وسط السكـــــــات

أنا عايشه يا ابني.. بحاجة أبوك متونســــــــه

وبدخلتك ويّا العيال متونّسه

وأنا عارفه يا ابني،إن خدتني البيت الجديد

رايحه أتنســي .. وأنا يا ابني مش عاوزة أتنسي ؟!!

فإن كنت محتاج الوســع لأجل العيــــال؟

هات العيـــــــــــــال

أنا عندي يا ابني سرير كبير

حاارقد علي حرف السريــــر

وحاسيب لهم باقي السرير

وإن كنت محتاج السرير ؟؟؟.

خد السريــــــــــــر!!!

إن شالله أنام فوق الحصير

لكن أنام وسط الأمـان !!!

خليني يا ابني ف وسطهم ..

قدّرني (واحده) منهــــم

أصحي وأبات على حسهم باقي الزمان ..

وماهوش كتير ؟؟؟.. صدقني يا ابني ؟! ماهوش كتير

أنا مش حاأعيش أدّ اللي عيشته

ولا نفسي أعيش بعد اللي شفتــه

كمّّل جميلك .. واستر الباقي ف حياتي

أنا عمري يا ابني قصاد عينيك ..

فرّطت ف أمي أو حماتـي؟

إن كان ده مني ف يوم حصل

أنا كنت أقول باخد جزاتي

ما تقوللي إيه خلاني يا ابني أهون عليك

وساحبني ويا الهدمتين

رايح تسلمني بأيديك

فرطت ف امك؟.. قوللي ليه

أنا عمري يوم فرطت فيك

***

وإن كان علي ضيق المكان

ما أنا قلتلك خد السريـــر !!!

وإن كان علي ضيق المعيشة

أبوك سايبلي معاش كبيـــــــر

قسمته يا بني من زمان: النص ليك .. والربع مصروف العيـــــال

والباقي مصروف الـــــدوا !!

لكن خــلاص.. وحياة عينيك ما عاد حايلزمني الدوا

خد المعاش .. كل المعـــــــــــــاش !!!

لكن بــلاش أحس إن ربايتي فيك راحت بـــلاش