قصيدة : " كفاية "

[أحمد أبو الشيخ أحمد]

كتبت تلك الأبيات العامية منذ عشرة أعوام حينما كان لهم السطوة و الغلبة , و أخذتهم العزة بالإثم ظناً منهم بأنها تدوم , فلينظروا اليوم أين بهم صارت ؟ اللهم لا شماتة , و إن حق للمظلوم أن يفرح بنصرك و يعجب لعجيب صنعك الذى تدير به كونك . (من ملاحم المظاهرات التى قامت بها حركة كفاية فى وجه النظام المستبد )

كفاية

***

كلام جرايد يا بوى
ماشى ما بين الناس
جبت الجرايد أرتها
جابت وجع بالراس
مهو من زمان
نفس الكلام ينكتب
نفس الكلام محتاس
ضاعت فلوسك يا صابر
على كلام عباس
مش لاقى
حتى نتيجة
و بننضرب . . ننداس
عملت ألف مظاهرة
و بقول كفاية خلاص
قالوا النظام غصب
عنك
مهى بلطجة بحراس
الكرسى أصله بتعنا
و هـ يبقى لينا ميراث
و أنسى بقى الجعجعة
و أتهد يا أبن الناس
لا حد هيهمنا
و هو ده النظام و خلاص
أساس و بنأسسه
يكتب بقى عباس
كلام جرايد يا بوى
و بيبعوه للناس
بالمقلة منه كتير
قرطاس فى ديل
قرطاس
فكرك سمعت كلامهم
أسأل كدا الأستاذ
أنا قلت برده كفاية
لو أنضرب بالرصاص
و نزلت تانى مظاهرة
نزلت تانى يا ناس
بنده عليكم بقى
وبمكرفون حساس
بسئلكوا بأسم البلد
فين الشهامة يا ناس
وطنية متأصلة
ول كلام و خلاص
مكفاية عشرين سنة
كفاية ذل مداس
كفاية عشنا بضنى
كفاية من دى الراس
حبوا البلد يا أخوتنه
عيشوا بقى الأحساس
أ.أ.أ ( الزينبى )