نشرة أخبار فلسطينية ...... تفضلوا

[نجيب صبري]

شو ناطْرِك عَالجَمِر يا نَشْرَة الأخْبارْ =شو ناطْرِك في قَهِر واعْصاب مَشْدودي
مالو فُؤادي أنا مَ يْطيق لاسْتِنْظارْ = كِنّو عِرِف هالعُمُر دَقّات مَعْدودي
تا أسْمَعِك عالهَدى أعْلَنْتْ لاسْتِنْفارْ = وْشَدّيت فِيّي القُوى وِبْذَلِت مَجْهودي
وخَرْسَنِت حَتّى أنا وِوْلادتي لِصْغارْ = وسَكَّرِت خَطِّ الحَكي وِالباب مَسْدودي
وقُدّام شاشِة عَجيبِة بْتِكْشِفِ الأسْرارْ = مَدّيت حالي وْبِقَلْبي هْموم مَمْدودي
وِشْوَيْ مَرِّ الوَقِت تا يِبْتِدي المِشْوارْ = وحَسّيت نَفْسي بْلِقا عِشْتار مَوْعودي
وِالشّاشِة لَمْعَت بِعيني وْهَلّتِ الأنْوارْ = يا فَرِحْتِك يا نِفِس وَصَّلِت مَقْصودي
وظَهْرَت صَبِيِّة عَلَيِّ إسِمْها أنْوارْ = مِن كُل نَسْمِة هَوى يا ناس مَحْسودي
الله عَطاها الحَلا وْتَعْباني عَالسِّشْوارْ = بِعْيونْها كَهْرَبا وِبْروق وِرْعودي
وِالنُّطُق مِن ثِمّها مَعْزوفة عالقيثارْ = وِالحَرِف مِنْها بيجيك بْثوب أنْشودي
يا عيني عا ثوبْها لِمْذَهَّب الأزْرارْ = وِشْعور موجِ البَحَر عَ كْتاف مَفْرودي
هاتي يَ سِتِّ الحُسُن أخْبارْ عَقْلي طارْ = شَكْلِك عَروس وعَ أجْمَل لوح مَصْمودي
أوَّل خَبَر نَعْقَتو قالَت يَأَهْلِ الدّارْ = بُكْرى الصُّبِح دارِكُم بِتْكون مَهْدودي
لِمّو الفَرِش وِالعَفِش وِن كان في تِذْكارْ = صورَة حَزينِة عَ صِدْرِ البيت مَسْنودي
وْثاني خَبَر إسْمَعوني كان في خِتْيارْ = تِسْعين عُمْرو ، وسِنينِ بْبُّؤُس مَجْلودي
بِالأمِس وَدَّع حَياتو بْكَم صَلْيِة نارْ = زارَت صَباحو بْحِقِد مِن ثِمّ بارودي
وثالِث خَبَر غَنَّتو وِبْصوتْها مِزْمارْ = عَن بِنِت في المَدْرَسِة باوْصاف مَحْمودي
عا بيتْهُم راجْعا وِالموت إلْها زارْ = طَلْقَة رَشيقَة أجَتْها بْثَلِج وِبْرودي
ورابِع خَبَر زَفَّتو مِن دون عَزْفِ اوْتارْ = عَن كَم طِفْلِ اسْتَراحو بْموت مَعْمودي
عَشْرَة عَدَدْهُم ، طَرايا ، في عُمُر لازْهارْ = في بالوَطَن مُتَّسَع لَقْبور وِلْحودي
وخامِس خَبَر نَشْرَتو عَن شَبّ صِدْرو ثارْ = مَعْروف بارْضِ الوَطَن بافْعال مَشْهودي
إمْبارْحَة بِالفَجِر عَن جِسْمُه راسو طارْ = وْإمّو الحَنونِه اكْتَفَت في فَنّ زَغْرودي
وسادِس خَبَر عَصْرَتو مْنِ الرّيح وِالإعْصارْ = قالَت بَلَدْكُم بِها شُبّان مَطْرودي
مِن شان هيكَ أجونا فَجَّرو الآبارْ = ويا ريت سِلْمَت بْيوتِ عْتاق وِعْقودي
وْسابِع خَبَر صَنْعَتو مْنِ الشّوك وِالصَّبّارْ = قالَت شَجَرْكُم بِخَبّي فْهود وِأسودي
مِن خوف يِصْبِح غَداً غابِة مِنِ الثُّوّارْ = نامو ، بْتِصْحو على الشَّجَرات مَحْصودي
وثامِن خَبَر عَن عِرِس في مْحافَظِة لَ نْبارْ = لَمِّة حَِبايِب ، وَهِل ، وِطْيور وِوْرودي
سُبْحان رَبّي قَصَفْهُم سَيِّدي الطَّيّارْ = وِالحِجِّة إنْهُم عَساكِر ليل وِجْنودي
وتاسِع خَبَر في شَجِب حامي وِاسْتِنْكارْ = لَلّي فِ صِدْرو كَرامِة اليوم مَوْجودي
مَطْلوب خَلْعِ المُروءَة وسَحِب دَمِّ يغارْ = ومطْلوب تِنْسى مَجِد آباء وِجْدودي
وْعاشِر خَبَر عَن قَصيدي خَلَّدَت لَ حْرارْ = صارَت قَذيفِة بِهالدّيوان مَرْصودي
مَطْلوب ذَبْحِ الأدَب وِالشِّعِر وِالشُّعّارْ = ومَسْموح تِحْكي فَقَط كِلْمات مَحْدودي
مِشْ ناطْرِك للأبَد يا نَشْرَةَ الأخْبارْ = مِش ناطْرِك في قَهِر واعْصاب مَشْدودي
ما عُدْتْ أسْمَع إلِك لا بْليل ولا بِنْهارْ = ومَعْروف إنّو العُمًُر دَقات مَعْدودي