نجمتين وليل

[علي الكثيري]

على اعتاب احلامي وشارق من خيوط الضي
اسامر نجمتين وليل ونومي يلفظ انفاسه

وانا وآخر تراتيل الوله واشجان بنت الحي
خذلنا الحلم في صحو المنام المؤرق نعاسه

ومادام الشجن وارف تدلى من عيون الفي
حرام الحلم يخذلنا بليلٍ يحتَضر كأسه

لاجلك يا أمل نبضي تدفق من وريدي المي
ليبعث في بقايا الروح شعورٍ ميت إحساسه

وانته في يباسك جدب عروقٍ ما نفعها الرئ
وانا اللي راجي السقيا عطاي طاف بقياسه

سنينك ترتجيني عمر وانا اظن المسافر حي
تصورته شعور وحلم وهو مفقود جُلاسه

ولملمت الحلوم اضغاث ولاجمّعت بيدي شي
رجاء معقود بالاحلام فراغٍ يشتكي ناسه

ولكن للرجاء باقي بصيصٍ في لفاف الطي
إذا مد الصبر طيه وطار الليل بلباسه

يمكن استعيد قواي اجمع من شتاتي شوي
اسامر نجمتين وليل وخلٍ يسدل انفاسه