تنهيد بيسابق صوت التكييف ( قصيدة لاشرف الشافعى )

[أشرف الشافعى]

تنهيد بيسابق صوت التكييف

إحساسك ايه

وانت بتفرد دراعاتك ع الآخر
علشان تحضنهم
وف لحظة تحس انك حاضن نفسك؟
إحساسك إيه
لما مسكت صورهم
ولقيتهم بقوا أكبر بكتير من كل هدومهم
اللى انت شاريها وقلقان
لتكون واسعة عليهم ؟
إحساسك ايه
لما بتسمع صوتهم ف التليفون
وانت مكدب ودنك
ومافيش غير بسمة عبيطة على شفايفك
مش قادرة تصدق
ولا عارفة تجارى كلامهم؟
إحساسك ايه
وانت برغم البعد اللى مابينكم
شامم ريحة حكمة حزينة ف نظراتهم ؟
إحساسك إيه
وانت بتندم ... دلوقتى
على كل زعقيك ف وشوشهم
وانت بتتفرج على ماتش الأهلى ؟
وهما بيتنططوا قدام التليفزيون
إحساسك ايه
وانت بتتدارى ف خجلك
وبتهرب من ذنب معشش جواك
من نرفزتك
علشان مش عارف تقعد مع نفسك ؟
طب آديك دلوقتى لوحدك
مش طايق تقعد مع نفسك ليه ؟
ومافيش ولا صوت غير صدى تنهيدك
عمال يتسابق مع صوت التكييف
مش عارف ليه تستمتع بنهائى الكاس ؟
مع إن الجو هدوووووووووء ع الآخر
مش قادر تتنرفز ليه
على عفاريت الدنيا اللى بتتنطط قدام وشك
إيه رأيك دلوقتى ؟
دلوقتى
مافيش قدامك
غير حل من اتنين
ياتقوم تلحق آخر طيارة
قبل ماكل هدومهم تصغر
يا ترد عليا ....
( إحساسك إيه
وولادك عمالة بتكبر
وانت
ب
ع
يـ
د ؟!! )
أشرف الشافعى
جدة
4/7/2007 م

[حنان عبد القادر]

الغربة ياعزيزي ..الغربة
أكبر غول يبلعنا بفرحتنا
قلبي معاك .

[أشرف الشافعى]

المشاركة الأصلية كتبت بواسطة حنان عبد القادر

الغربة ياعزيزي ..الغربة
أكبر غول يبلعنا بفرحتنا
قلبي معاك .

الاخت الفاضلة / حنان
عندما يلقى المساء الحزين عبائته على الغرباء
تستوحش انياب الغربة لتلتهم مابقى فينا من صمود
ولا ينقذنا منها سوى شوقنا لمن احببناهم
وسعينا ليكون غدهم افضل من امسنا
شكرا لمرورك واتمنى ان نتواصل عبر ابداع مفارق دائما
اشرف الشافعى

[سميرسعد]

السلام عليكم ورحمة الله وبركاته
واحساسك ايه لما يكون ابنك ساكن فوقك ويطلع السلم من غير مايكلف خاطره بالقاء التحيه والسؤال عليك ؟ طبعا ملهوف على مراته وعياله وده حقه وحقهم . .
وانت لازم تلتمسله الاعذار . . معلش ده راجع تعبان بعد يوم عمل طوله 12ساعه ! وغيره من الاعذار علشان ماتلعنش كل لحظه شقاء ضيعتها فى توفير احتياجاته !
ياسيدى انت فى البعد تحلم باللقاء واتمنى ان لاتصدم عندما يتحقق !
نحن ياصديقى فى الزمن العجيب !
ترجع بالسلامه . . تحياتى

[عيسى عدوي]

أخي أشرف ..ردالله غربتك
قصيدة رائعة تستحق التثبيت
مودتي لك

[سعيد حامد شحاتة]

صديقى العزيز جدا الى نفسى

أشرف الشافعى

أتمنى أن تقرأ رسالتى اليك

بداية أنا فى غاية السعادة لمتابعتك التى تشرف أعمالى دائما

أنت مبدع بحجم كلمة ابداع

حينما أقرأ اسم أشرف الشافعى فى منتدى والله بمنتهى الأمانة أشعر بأننى متواجد على هذا المنتدى منذ فترة كبيرة لأننى أقابل شخصا أعتز بصداقته وأعتز بإخلاصه لإبداعه

وحبه للابداع عامة

أنت مبدع لا تستطيع الكلمات أن تجارى اخلاصك لهذا المجال

تحياتى لك وخالص حبى وتقدير وأنتظرك صديقا يشرفنى دائما

http://www.saidshehata.jeeran.com/said

http://www.saidshehata.jeeran.com/

http://said-hamed.maktoobblog.com

http://said-shehata.maktoobblog.com/

سعيد شحاتة

[محمد الرويضي]

فليسقط الشعر ان لم يصل الى قلب قارئه....

مسيت قلبي وقلب من حولي بصدق.....
نص رائع وانت رائع فارجع.....

محمد الرويضي