الا النبى

[سعيد حامد شحاتة]

دا لأنك

أول واحد خشّ ضلوعى بجد وداس

ولأنك

أول واحد هدّ السد الفاصل بين الناس

ولأنك

أوّل بذرة حب اتزرعت جوّا الراس

ولأنك

أعظم كلمة أنا ممكن أقولها على الكراس

كلمة نبى

يا كل كائن فى ( الزمان اللولبى )

يا كل سلطان أجنبى

يا كل واحد

عاش غبى وهيموت غبى

الا النبى

أنا مش صبى وبيّاع كلام

عن أولياء الله وسيرة الأنبيا

ولا من هواة الضحك

فى وشوش الكلاب والأغبيا

ولا من هواة الهرتلة

ولا من هواة الأجوبة الفارغة

اللى مالهاش أسئلة

ولا نفسى أقف ع المدنة وأحدف قنبلة

أنا بس شفت المسألة

إن اللى شايلين الرايات واقفين غلط

وإن الكلاب فى الغرب قاعدين بالزلط

ومن العبط

إنك تشوف رايتك هناك متنكسّة

وإنك تشوف كل الجيوش متقدمة

وجيوشك أنت مكسكسة

وإنك تحطّ ايديك فى ايد متنجسّة

وإنك تطبطب فوق قلوب متيبّسة

وإنك تحسّ

إن الثوابت كلها طلعت فاشوش

وإنك تحس إن أنت من جواك هاموش

وإن الرتوش صبحت علم

وإن القلم عمّال بيكتب أجنبى

وإن الكلاب فى الغرب بيسبّوا النبى

يا كل واحد عاش أبى لدرجة ملاك

مين اللى خلاك تنحنى

مين اللى داس

على عودك المفرود وخلّاه ينتنى

يا كل واحد عاش أبى

يا كل كائن عاش غبى وهيموت غبى

الغرب بيسبّوا النبى

وأنا مكسبى العار والهلاك

الغرب راسم لامتلاك كل النفوس المتعبة

الغرب واقفين للرموز الطيّبة

يا دموعنا يا اللى أنتى تمللى قريّبة

هتفيد بإيه الطبطبة تحت الخيول

كل المعانى اتهلهلت جوّا العقول

كل الكلاب فى الغرب مقطوعة الديول

وولاد زناة الأرض بيسبّوا الرسول

وأنا نفسى أقف وأهتف وأقول

إن الشعوب الطيّبة مالت

وإن الكواكب كلّها انزالت

وإن العيار الفالت اتحكّم

مش جاى أقول الشعر وأتهكّم

أنا جاى أقول الحق

احنا خلاص داخلين زمان الرقّ

أنا نفسى أقول للأفعى جوّا الشقّ

إن الأساس خايخ

وإن السلام ويّا الكلاب بايخ

وإن الوجع شايخ على ضفاف القلوب

وإن الضمير جامد جمود الطوب

وإن الزمن مقلوب على دماغنا

وإن الكلاب نازلين على صداغنا

أنا نفسى أقول للأفعى لدّاغنا

إن احنا رغرغنا كما الأموات

وإن التاريخ قلّاب ماهوش فوّات

وإن السكات يمكن يكون خطّة

واللى احنا فيه دلوقت دا محطة

والقطر لازم يستقيم ويفوت

حق الرسول هنجيبه بالنبّوت

حق الرسول هنجيبه لو هنموت

حق النبى الغالى

أنا ليه بقيت بصرخ بصوت عالى

مش واقف أتفرّج

الناس فى سيرك كبير وبتهرّج

يارب يا مفرّج كروب الصدر

أنا ناوى أقوم وأدعى ف ليالى القدر

إنّى أتوهب لله ولأحبابه

وإنى ما أخبّط غير على أبوابه

وإنى ابتسم قدّام رسول الله

وأقعد معاه وأقعد مع أصحابه

يا رب تجمع قلبى فى رحابه

واجعل كتابه الأول الآخر

ليه الكلاب عمّاله تتقدّم

واحنا اللى ليه دايرين بنتّاخر ؟

مين اللى حطّ الردّة ع الفاخر

ليه البواخر نايمه ع المينا

ليه انتظرنا الغرب يدّينا ؟

ليه سيبنا بعضينا على السكّة ؟

الفكّة دايرة تهزّ فى جيوبى

والتوب دة مش توبك ولا توبى

التوب دا توب أمريكا والدنمارك

وأنا رافض التطبيع مع الخاين

الشمس طالعة ونورها مش باين

وأنا دمّى مش هاين ومش خوّاف

وها أقولها حرّة وعلّقولى النّاف

أنا كلّى شوق للساحة والسيّاف

أنا مش هشيلك تانى ع اللكتاف

ولا ناوى أخاف منّك وأطوف وأسعى

أنا عندى أشيل القصعة وأصبح حرّ

يغرق شراعك أو يطول البر

لازم ندوس ع الشر بالجزمة

لازم نقول سبّ الرسول أزمة

لازم نقف ويكون لنا لازمة

يا نموت فى وسط الحر من غير زاد

الغرب بيسبوا النبى يا ولاد

سَبُوا النبى يا عباد بتعمل خير

سَبُوا النبى يا اللى انحنيت للغير

يا كل طفل بيتولد بضمير

الغرب بيسبوا النبى

يا كل كائن فى الزمان اللولبى

يا كل واحد عاش أبى

لازم نقف ونقول لهم

الا النبى ***** الا النبى

[عيسى عدوي]

أخي سعيد طابت الأنفاس وصح لسانك على هذه القصيدة الرائعة بكل المقاييس وتستحق التثبيت
مودتي لك

[سعيد حامد شحاتة]

أشكركم على تثبيت القصيدة
مع خالص حبى وتقديرى واحترامى للجميع

[كفا الخضر]

إلا النبي عليه السلام
بارك الله بك أخي سعيد
وجزاك الله خيرا

[سعيد حامد شحاتة]

اسمحولى ان اشكر هذا الموقع العبقرى واشكر ردودكم العبقرية

[د.طه هنداوي]

الموج الهادر .. سعيد

سعداء بموجك ياسعيد .. زي النبي
يارياح تهب على الجبان والأجنبي ابن الغبي
الله يزيدك من نعيمه وحكمته
ياسعيد شحاته
انت في المضمار .. أبي

[سعيد حامد شحاتة]

أشكر كلامك
يا صديقى المتهم
انك ركبت الحلم واستنيت هناك
اشكر كلامك
يا صديقى المتهم
رغم انى
كان نفسى بصراحة أركب معاك

[وفاء أمين]

لجل النبي
سعيد
وحامد ربنا
واقف بينده من بعيد
يرد غيبته بصوت قلم
إنبح صوته من الألم
بيقول ياهوه ياخلق هوه
إلا النبي ....
قصيدتك مشحونه بالحب والغيره الصادقه
سلمت يداك يا شاعر

[سعيد حامد شحاتة]

المشاركة الأصلية كتبت بواسطة وفاء أمين

لجل النبي

المشاركة الأصلية كتبت بواسطة وفاء أمين

سعيد
وحامد ربنا
واقف بينده من بعيد
يرد غيبته بصوت قلم
إنبح صوته من الألم
بيقول ياهوه ياخلق هوه
إلا النبي ....
قصيدتك مشحونه بالحب والغيره الصادقه
سلمت يداك يا شاعر

********************************
اختى العزيزة الشاعرة العبقرية
أشكر مرورك الطيب وردك الرائع وتفاعلك القوى الذى يشبه شربة الماء فى لحظات الظمأ

[دصبرىإسماعيل]

الله عليك ياسعيد
ايه يابنى الحلاوة دى
تسلم ايديك
انا نسختها وهاوريها للأطباء فى المستشفى
حلوة حلوة حلوة
اسمح لى

[إياد حياتله]

هذه ملحمة رائعة لشاعر أروع

صلى الله عليك يا سيدي يا رسول الله
وحيّاك وبيّاك
أيها الشاعر الفحل

[سعيد حامد شحاتة]

المشاركة الأصلية كتبت بواسطة دصبرىإسماعيل

الله عليك ياسعيد
ايه يابنى الحلاوة دى
تسلم ايديك
انا نسختها وهاوريها للأطباء فى المستشفى
حلوة حلوة حلوة
اسمح لى

***********************

يا به
دا انا كلى تحت امرك يا دكتور صبرى
مرورك هنا أسعدنى أيها العبقرى