الحلقة 1 / وجــــــاء رمضان !

[علا الياس]

http://aklaam.net/forum/showthread.php?t=7551

*

* المشهد الاجتماعي الأول: وجاء رمضان !

ابو حسين كوم ..كوم يا زلمه
لا حول ولا كوة الا بالله شو بدك يا مره ؟
يا زلمه كوم بكره رمضان كاعد نايم لهلا لشو هو النوم بطول العمر
ليش صبحوا شايفين الهلال واثبتو ؟ يا مره حرام عليكي تعبان هو يوم هالجمعه الي بناملي فيه ساعتين زياده
لا تخليني يا ابو حسين أطلع عن اعصابي يا زلمه كوم بدنا أغراظ وبدك تجهز الولاد وبدك تصلي الجمعه وراك شغل كثير
يا ام حسين كل هاظ اتذكرتيه هسع ؟ ما رمظان صارلو من الشهر الماظي بحكيلش أنا جاي ظليتي لآخر يوم واشتغلتي فيي ؟!!
بدك تكوم ولا ؟..
كايم كايم انا بكدر على زعلك يا حلو انت ، ساك الله فراكك يا مره
شو كلت ؟!!
بكول ساك الله ما اجا رمظان اشتكنالو
آه بحسب
لا تحسبيش دخيلك انا
يلا روح لم الولاد حواليك واعطيهم خطبة رمضان مشان تروح عالسوك اتجيبلنا اكم غرظ
آه أكم غرظ ما انا مش عارفتش هلا بشتريلها السوك شلو
شو كلت ؟
كلتش اشي هيني كايم
يابا يا محمد .. يا سهاد يا مصطفى يابا جميله تعالوا يابا الله يرضى عليشوا.. تعالو ا..
محمد
شو بدك
كوم ابوي بنادي علينا
هو ابوي لحالي ؟ روح انت شوف شو بدو
يا رجل قوم بدو ايانا كلنا بكره رمضان بدو يسمعنا الخطبه
احسن! راح اليوم كلو فش طلعه والشباب حيرقصوا عموالي
يا رجل قوم الله يهديك نرد عأبوك بيصيرش هيك
مصطفى..اطلع من راسي مش طايقك ولا ابوك عالصبح
انا رايح وخليه هو يجي يصحيك
لاااااا قايم قايم الله يقيمني من هالدار قريب
سهاد ابوي بينادي ..
شو في ؟
امي اكيد صحتو مشان رمضان
جميله يختي ما هي امك بتتذكرش الا كبل بيوم هيني جاي روحي كبلي
ولك محمد صرلنا ساعه بنستنى بحضرة جنابك ليش اتأخرت ؟
يابا ما هو..
ماهو شو ؟ هامل يابا انت ما انا عارفك ..
يا با..
اسكت بديش اسمع صوتك اسكت هاظ الكبير اللي عليه الأمل شبرت اليهود شلهم لعيونك يابا ..
بكره يابا يا حبايبي رمضان ان شاء الله ..
محمد يا كبيرهم احكيلهم يلا شو رمضان
آه يابا بحكيلهم ليش ما احكيلهم : اسمعوا : ترى رمضان كويس صوموا تصحوا .. كيف يابا عجبتك ؟
الله يا ريتو سنحك يابا .. رمضان كويس ؟ هاظ اللي طلع معك ؟ هو صاحبك ولا زميلك بالشغل ؟ الحك علي ما انا عارفك ..
احكيلنا يابا يا مصطفى انت النافع يابا الله يرضى عليك احكيلنا شوي عن هالشهر الفضيل
قال تعالى : يا أيها الذين آمنوا كتب عليكم الصيام كما كتب على الذين من قبلكم لعلكم تتقون .
صدق الله العظيم وقال الحبيب صلى الله عليه وسلم : من صام رمضان ايمانا واحتسابا غفر له ما تقدم من ذنبه .
الله يرضى عليك رضى ربي وكـ (قـ)لبي يابا عليك
يابا يا جميله احكيلنا شو بنستفيد من الصيام غير انو بينغفر ذنبنا ؟
اول اشي يابا بيريح المعده من عملها المتواصل فبيذوب الفضلات وبيقوي الجسم وبيريح المدخن من التدخين الضار..
سامع يا محمد يا ابو بطن انت ريحوا بهالشهر اعطيه ويك اند مؤكته والدخان الفرط اللي بتشتريه من وراي مليح تتركو ..
بدخنش يابا انا..
لا ما انا بشمش ريحت ثمك وانت نايم ولا بسمعك بتكح ولا بيكلي عمك ابو خليل انو بتشتري منو فرط يا كحته وين بروح راتبك مش عارف ..
يابا ..
اسكت واسمع الله يهديك اسمع..
محمد بينو وبين حالو : سحبت اليوم كلها مش حنخلص من دواوينك يا ابو محمد ..
شو كمان يا جميله بنستفيد من الصيام ؟
بيهذب النفس يابا يعني اللي بيضل يدعي عولادو مثلا بيصير يخفف دعاوي واللي بيسب بيبطلها..
شو كصدك يابا ؟
لا يابا انا ما كصدي اشي بحكي عادي
فكرت يابا كصدك عني
لا يابا انت فش منك اثنين ..وكمان الصائم بيشعر بالمساواة مع الصايمين وبيصير في وحده اجتماعيه بتقرب الناس من بعض
سهاد يابا بطلي المثاوبه هاي وسكري ثمك شوي المفتوح للذبان وكوليلنا شو واجباتنا برمضان..
ما انتو مصحينا بدري يابا واليوم اجازة ..
ما هي امك صحتني وحكم قراقوش على الجميع اشمعنا انا ؟
هي وينها امي ؟
بتحظرلي بلائحة المشتريات شوية أغراظ هلا بنشوف ما اتذكرت انو رمضان الا كبل بيوم ..
خلص يابا انت ما بتسدك حد يفتحك على ام محمد ؟
احكي واجباتنا برمضان خلي محمد يبطل يجحر فينا وراه رئاسة دولة مستعجل..!
نحافظ عالصلاة ، ونحسن الأخلاق ، لا نتكلم كلام بذيئ ، لا نسرف بالطعام والسهر ، لا نتفرج عالتلفزيون كثير ، لا نضيع السحور والفجر ، ونقرأ قرآن ونكثر من العبادات لانو شهر فرصه قال صلى الله عليه وسلم : اذا دخل رمضان فتحت ابواب السماء وأغلقت أبواب جهنم وسلسلت الشياطين .
كل عمل ابن آدم يضاعف الحسنة بعشر أمثالها الى سبعمائة ضعف قال الله عز وجل : إلا الصوم فإنه لي وأنا أجزي به يدع شهوته وطعامه من أجلي للصائم فرحتان فرحة عند فطره وفرحة عند لقاء ربه ولخلوف ( الخلوف : تغير رائحة الفم ) فم الصائم أطيب عند الله من ريح المسك .
الله يرضى عليكي يا سهاد شايفه لما تبطلي تتثاوبي بتفيدينا احنى وبترتاحي من الذبان كيف ؟
يابا بدي اسألك شو اللي بيبطل الصوم ؟
محمد بيسأل ؟ يا سلااااام والله بيجي منك يابا لسه بديش افكد الأمل فيك
محمد بينو وبين حالو : انا الغلطان اني سألتو ..
الأكل والشرب عمدا القيء عمدا الحيض والنفاس والاستمناء او الجماع ، اما يابا الاكل والشرب نسوه او خطأ والقيء غصب عنو الواحد لا بيفطرش بيكمل صيامو عادي ....
هاي امكوا اجت يلا كومو كل واحد يلتهي بحالو وجهزوا حالكوا محمد ومصطفى معي عالسوك وجميله وسهاد مع امكو ساعدوها علكلولنا الهلال عالشباك وعلكوا الفانوس والنجوم معاه خليه الدار ترحب بالظيف اللي اشتكنالو كل بيوت المسلمين هلا بترتدي حلة الهلال فرحانه انو الله عادوا عالناس برحمه ومغفره ان شاء المولى.. وساعدنها يابا الله يرضى عليكن ..
يابا انا واعد صحابي ..
محمد انا كلت حتيجو معاي يابا لا تلف وتدور هاظ مصطفى ولا فتح ثمو انت لازم تجادل ؟
.. جهزوا حالكوا انروح عالصلاة وننزل عالسوك يلا ..
يابا تذكرتوش الا اليوم بالأزمه ..
محمد ؟
رايح رايح .. الله يصبرني عليكو وينطق هاظ ابو الهول اللي جنبي اللي جايبلي المعايره ..
انا شو خصني ؟
ما كلو شوف مصطفى شوف مصطفى اتلحلح احكي اشي..
بديش احكي انا بريح راسي ابوك بسمعش مني اصلا..
يا زلمه اسكت حتجلطني انت وابوك اسكت..
شو يا ام محمد وين الوركه بالاغراظ ؟
هيهم اكمن غرظ بس ..
صفحتين وجه وكفا وشويت اغراظ ؟!!!!!!!
ما هو لرمضان ؟!!
هو احنا بنوكلش الا برمضان ؟
يا ابو محمد رمضان غير ..
ولا غير ولا اشي اكلنا هو هو .. ورمضان عباده مو اكل ونوم شو هاظ ؟ !!
وبنحكي الاسعار والسوك ملان .. ما الناس بتتذكرش غير آخر اسبوع ولا يوم وبيصيرو زي الهجين ولا اكنو مجاعه برمضان !
حجيب كالعاده يا ام محمد .. مش جايب كل هاظ ولما ينقص اشي بنجيبو مش داخلين عمجاعه وأكلنا هو هو ..
ما انا عارفه حتنكد علي !
لا بنكد عليش ولا تنكدي علي هاظ هو المنطك والصحيح انصتي وكل عام وانتي بخير !

************************************************** **********************************

** فزورة الحلقة:

أول من بنى هيكل اداري للدولة فصل بين السلطة العسكرية والسياسية وهو اول من كتب التاريخ واول من عاقب على الهجاء وأول من جمع الناس في صلاة الجنازة على 4 تكبيرات واول من جمع الناس على امام يصلي بهم التراويح برمضان كانت كلماته تهز امبراطوريات العالم بالمقابل كان متواضعا يلبس ابسط الثياب . اسمه اقترن بالرجوله والصلابة فقد كان من أقوى رجال مكه طويل مهيب ابيض الوجه أصلع أشيب ذو لحية عظيمة .
فــــــــــــــــمن هو ؟

أكرر للأهمية : الاجابه ستكون على الرسائل الخاصه لبريدي لاعطاء الفرصه للجميع وسيتم ذكر الرابح لكل حلقه وتثبيت اسمه مع الاجابه الصحيحة على كل نجمة بالصورة حسب التسلسل الرقمي ..


** الجزء القرآني الأول:
القرآن الكريم 30 جزء لنختمه معا لمرة واحده بهذا الشهر سأتناول لمحة عن كل جزء بالترتيب مع اضاءة عن الكتاب الكريم :
الجزء الأول يبدأ بالفاتحة التي سيمت بأم الكتاب وفاتحة الكتاب لكونه افتتح بها لينتهي هذا الجزء عند الآية (141) من سورة البقرة وهي من أطول سور القرآن على الاطلاق اشتملت على معظم الأحكام الشرعية في العقائد والعبادات والمعاملات والأخلاق وأمور الزواج والطلاق والعدة وغيرها..

**/ سمى الله القرآن في كتابه بأربعة أسماء : القرآن ، الكتاب ، الفرقان ، الذكر .

[أحمد سلامة]

موضوع رائع وشيق جداً عزيزتي علا..
وقد قمت بالإجابة على سؤالك وأرسلت الإجابة
على بريد رسائلك الخاصة..
بوركتِ وجعل الله ما تقدمينه في ميزان
حسناتك يوم القيامة..

محبتي القلبية..

[علا الياس]

المشاركة الأصلية كتبت بواسطة أحمد سلامة

موضوع رائع وشيق جداً عزيزتي علا..
وقد قمت بالإجابة على سؤالك وأرسلت الإجابة
على بريد رسائلك الخاصة..
بوركتِ وجعل الله ما تقدمينه في ميزان
حسناتك يوم القيامة..

محبتي القلبية..

مبارك لك اول اجابة صحيحة

لن أعلن عن الاجابات الصحيحة حتى نهاية الشهر الكريم ..
وسيبقى الباب مفتوحا بكل حلقة لأكثر من اجابة صحيحة ..
وساعمل على احصاء المشاركات الصحيحه وتكون الجائزة للذي حزر اكبر عدد منها ..
وان تعادل اثنان .. فالقرعة

شكرا جزيلا لرفع المعنويات اخي احمد .. ما قلتلنا نقدك للمشهد .. اين واقعيته واين ثغراته؟

[ايهاب ابوالعون]

مشهد يصف حال الكثيرين , و الذين يؤمنون بضرورة التعامل مع الواضع ,, و لا يفكرون بتاتا في تغييره .

شكرا لك أخت علا على هذه الحلقة , واعذريني على الايجاز , فرمضان في أول يوم يكون شاقا .

احترامي

[علا الياس]

المشاركة الأصلية كتبت بواسطة ايهاب ابوالعون

مشهد يصف حال الكثيرين , و الذين يؤمنون بضرورة التعامل مع الواضع ,, و لا يفكرون بتاتا في تغييره .

شكرا لك أخت علا على هذه الحلقة , واعذريني على الايجاز , فرمضان في أول يوم يكون شاقا .

احترامي

لك كل العذر اخي العزيز ايهاب لا عليك قلبي معك ويعطيك العافية وصياما مقبولا ان شاء الله