راح المزح ....قصيدة للشاعر الفلسطيني الكبير نجيب الصبري ...

[عيسى عدوي]

راحِ الْمَزِحْ ,صارِ الأَمِرْ جَدّي = يَ خْيولْنا جِدّي السَّعي جِدّي
لَوْ يِعْرِفِ اللّي في الْوَطَنْ بيصيرْ = بيصيحْ منْ تِحْتِ الْقَبِرْ جَدّي
جَدّي عُيونو كانتِ نْواطيرْ = نَظْراتْها للْقُدْسْ مُمْتَدِّهْ
عافِطِرْتو غَنّى لَ بابِ الْبيرْ = صارَتِ الْمَيِّهْ تِنْشِدِ وْتِحْدي
جَدّي مَ كانِ مْفَلْسَفِ التَّفْكيرْ = عَ الْكُرْسي ما فَكَّرِشْ بِالْقَعْدِهْ
نَسّى لَ تَفْكيرو بِ لِدْنانيرْ = تَفْكيرُهْ بِالأَقْصى وْبِالْمَهْدِ
خَجْلانْ أَحْكي وْفي الْحَكي تَبْذيرْ = كُلِّ الْحَكي يا ناسْ ما بِجْدي
مَطْلوبْ فِ فْلِسْطينْ نِعْمَلْ خيرْ = وِنْظُبْ كُلِّ الْحَكي عَ السِّدِّهْ
شو صارْلَكْ يا مَوْطِني لِكْبيرْ = خيرَكْ لَ كُلِّ الأَهِلْ بيقَدّي
تْرابَكْ فَرِشْةِ الْعِزْ وِالتَّنْويرْ = صَخْرَكْ بَحِبُّهْ يْكونْ لي مْخَدّي
فِ بْلادْنا عْصافيرْ عَمْ بِطّيرْ = كُلْ طيرْ بيهَدّي عَلى وَرْدِه
يا ريتْنا إِنْتو وْأًَنا عْصافيرْ = وِنْطيرْ في الأَقْصى سَوى نْهَدّي
فِ بْلادْنا طيبِهْ وْبَراءَهْ كْثيرْ = وِزْهورْها بِالْحُبْ بٍِتْنَدّي
وْفيها صَفاها الْ بِرْفَضِ التَّعْكيرْ = وْفيها الْفَوارِسْ تِقْهَرِ الشِّدِّي
يَ بْلادْنا يَ مْزَنَّرَهْ تَزْنيرْ = بِالنّورْ وِالْبَلّورْ مِعْتَدّي
دَخْلِكْ إِذا مِنّا حَصَلْ تَقْصيرْ = وجاهِلْ رَماكِ حَجَرْ لَ تْرُدّي
فْلِسْطينْ مُشْ لَوْحاتْ لَلتَّصْويرْ = وْلا أُغْنِيِهْ فِ شْريطْ مِتْرَدّي
وْضِدِّ الْبَياناتْ الْ بِها تَكْسيرْ = بِالْفَتْحَهْ وِالضَّمِّهْ أوِ الشَّدِّي
فْلِسْطينْ ثَوْرَهْ بْتُرْفُضِ التَّأْطيرْ = انْ صِرْتِ انا ضِدَّكْ وِنِتْ ضِدّي
فْلِسْطينْ موشِ كْتابْ لَلتَّنْظيرْ = مِنْ شانْ نِوْصَلْ لَلْحُكُمْ سِدّي
بِدْهاشْ لا عُمْدات وْلا مْخاتيرْ = شو عامِلِ الْمُخْتارْ وِالْعُمْدِهْ
وْلا هِيِّ شاشِةْ مَسْخَرَهْ وْتَزْويرْ = وِمْقابَلاتِ بْتِقْلِبِ الْمِعْدي
وْكُلِّ الْ بِتِقْنو الْفَنْ وِالتَّعْبيرْ = أَصْفارْ عِنْدِ الْحَدَثْ مِنْعَدّي
يا صاحْبينٍِ الرّايْ وِالتَّدْبيرْ = يا مالْكينِ الْحَلْ وِالْعَقْدي
ابّيضِ النَّوايا بْلادْنا بِتْسيرْ = وْإِخْلاصْكُمْ بيحَلْحِلِ الْعُقْدي
نِحْنا( الْمِسْتِرْ بيبُلِ) بْتَقْديرْ = بِنْقَدِّرِ الْ بِعْمَلْ عَلى الْوِحْدي
مِثْلِ الرِّماحِ بْتِرْفَضِ التَّكْسيرْ = لَمّا تْكونِ كْثيرْ مِتِّحْدي
لِلّهْ يا أَقْصى بَدا التَّحْفيرْ = نادي عَلى الْفُرْسانْ وِالْعِدّي
وِصْرَخْ يَ شَعْبي صَرْخِةِ التَّحْريرْ= وِنْهَضْ كَما الْعِمْلاقْ مِتْحَدّي
حالِهْ عَجيبِهْ ما لَها تَفْسيرْ = كُلِّ الدُّروبِ الْيومْ مِنْسَدّي
وِالْعَرَبْ عا أَخْبارْنا بِتْشيرْ = بيفَكِّرو إِنْها فِلِمْ هِنْدي
قَدّيشْ مِنّا اسْتَشْهَدوا بَكّيرْ = لكِنْ بَعِدْ فِ رْواحْهُمْ حِدّي
وْياما انْحَرَمْ طِفْلِ النَّقي لِصْغيرْ = مِنْ نومْةِ الْغُزْلانْ في الْمَهْدي

***
***********************************

بِالْحيرِهْ ليشِ اظَّلْ = لَوْ تِسْأَلِ بْتِنْدَلْ
بِالْوِحْدِهْ بَسِّ الْحَلْ = مِنْ دونْها بْنِخْسَرْ
مَبْروكِهْ وِحْدِتْنا = ما بينْ قادِتْنا
وِالشَّعِبْ يا إِخْوانْ = هَلَّلْ لَها وْكَبَّرْ
غَنَّتْ لَها الأَوْطانْ = وِالطّيرْ عَ الأَغْصانْ
إنْ شا اللهْ يَلّي كانْ = عِنّا مَ يِتْكَرَّرْ
إِلْخَيْ عانَقْ خَيْ = عيلِهْ فِ ذاتِ الْحَيْ
حَلِّ السَّنا وِالضَّيْ = ليلِ الْعَتِمْ نَوَّرْ
يا غابَةِ الثوارْ = يا منبتِ الأَحْرارْ
يا قُدسْ إِلْنا دارْ = غيرِكْ مَ نِتْصَوَّرْ

ودمتم سالمين غانمين


--------------------------------------------------------------------------------

[د. فوزى ابودنيا]

كل التحية لمن ابدع
وعظيم الشكر لمن نقل لنا الابداع الرائع الجميل
محبتى وتقديرى

[إياد حياتله]

الله على هذا القصيد المتخم بعشق الوطن
المتسربل بألوان حب الأرض
الصادح بالحق إلى آخر مدى
.
حيّا الله الشاعر الكبير نجيب صبري
وحيّا الله الأخ الحبيب أبا تامر