إللي ماتوا ف بورسعيد

[مسعدالنحلة]

إللي ماتوا ف بورسعيد

ـــــــــــــــــــــــــــــــــــ

ريحة عطور
متجمَّعه فوق القبور
جت من بعيد
من كل بساتين البلد
علشان تزور
أرواح بريئه
للي ماتوا ف بورسعيد
موتة شهيد
كان كلـُّهُم زي الورود
كان عندهم عشرين سنه
ف عُمر الزهور
كانت وشوشهُم فيها نور
جُم من بلادهم بالمُنىَ
عاوزين يغنوا ويفرحوا
راحوا على استاد بورسعيد
والكل لابس توب جديد
أحمر مزهزه يشـْرِحُوا
وكأنهُم ماشيين في عيد
جايين عشان بعد اما يخلص ماتشهُم
يتفسَّحوا ويتبحبحوا
قبل اما ينووا يروحوا
دخلوا المدرج مبسوطين
بيهللوا ويلوَّحُوا
وبسرعه كان الكل قاعِد مطرحُه
لاكِن طبول الحرب دقـِّت جمبُهُم
أصوات بترميلهُم شتيمه تسبُّهم
رفعوا إيديهُم للسما
طالبين سلام من ربُّهُم
ويقولوا : يا رب العباد
ليه يكرهونا ويرفضونا
واحنا ناس بنحبُّهُم
الكوره كان حيرانه بين الفرقتين
والأهلويه بين جيرانهم في المدرج والفريق مِتشتتين
مبقوشي عارفين إنـُّهُم يتفرجوا ع اللاعبين
واللا على شماريخ كتير متولعه
والماتش قرَّب ينتهي وقتـُه وكانوم مغلوبين
قبل اما تحصل معمعه
وبرغم دا كان مرعوبين
فجأه البُساط لاخضر ملاه المهووسسين
والمدسوسين
وبناس بتجري مُسْرِعه
حاصروا جميع الأهلويه اللي ف مدرج محبوسين
وف ثانيه دارت موقِعه
ما بين هجوم من سفاحين
وهروب من المستسلمين
بس البيبان مِتسنكره
شيئ من لزوم المعركه
المتدبَّره
وولادنا تجري ف كل حته وكانوا آخر دربكه
وعساكر الداخليه كانوا موجودين
لاكِنهم مش موجودين
أو كان وجودهُم فبركه
والمجرمين المأجورين
شايلين سيوف
نزلوا عليهم شكشكه
وكأنهُم ماكانوش ضيوف
أو ناس مسالمه جت تشوف
وسط الألوف
الماتش بوشوشها البريئه الضاحِكـه
الدم كان فوق النجيل
ومن الجُثث عمَّال يسيل
غطـَّى المكان
فوق الكراسي وع الحيطان
كان مجزره
وجُثث ولاد مِتنطوره
قبل امَّا تخرُج م البيبان
قبل اما تعرف إنها جوَّا اللومان
ووجوه كتير متصوره
معرفشي كان حرب لتتار
واللا لمجوس مِتبربره
ولمصلحة مين اللي صار
من قتل في وَضـَح النهار
ليه مصر بعد ماكان عَمَار
يخربها ناس مِتشفـَّره
لاكِن كـُتـَار
ووراها ناس مِتستــَّرَه
قادوم في كل بلادنا نار
تركوا في كل بيوتنا تار
كل اللي شـُفناه ع الهوا دا يبقى عار
حبَّة فلول مِتحرره
بيحرَّكوها من طره
خلـُّوا البلد مِتجرجره
علشان تـُقـَع في الهاويه
سيناريوهات مِتكرره
فيها المعارك دامِيه
وإدين لأطراف خافِـيه
عاوزه تجيب مصر لورا
فوقوا يا ناس مصر العِظام
قيدوا الشموع
بيدوا الظلام
خلوا الدموع
ترجع تنام
في عيون بلدنا الطاهـِره
خلونا نمشي للأمام
خطوات مهيش متحجره
من غير خنوع
من غير خضوع
لفلوس أميريكا الفاجره
أم العيون الغادِره
وولادنا مش ممكن تجوع
طول مااحنا قادرين ع العمل
طول ما احنا عندينا الأمل
طول مااحنا عارفين الخشوع
للهِ رب العالمين
حامي الشعوب المُقهره
قادر يبيد الظالمين
ويرد كيد المُعتدين
يارب جنـِّبنا الوقوع
في كمين أميريكا الماكِره
خلينا دايمًا آمنين
يا خالق الكون والورَىَ
واوهِب لنا النصر المبين
علشان نعود بعد السنين
نفتح بيبان الذاكِره
ونغني للنصر المجيد
ونحُط على قبر الشهيد
في كل صبح ليوم جديد
حبِّة ورود
وزهور جميله مزَهَره
علشان تظل المقبره
وفيها الشهيد
دايمًا تكون مِتعطـَّره
ــــــــــــــــــــــــ
************ ريحة عطور